ಬೆಳಗಾವಿ-10:ಬೆಳಗಾವಿ : ಇಲ್ಲಿನ ಸುವರ್ಣವಿಧಾನಸೌಧದಲ್ಲಿ ಕಳೆದ ಡಿಸೆಂಬರ್ 9 ರಿಂದ 19 ರವರೆಗೆ ನಡೆದ 10 ದಿನಗಳ ಚಳಿಗಾಲದ ಅಧಿವೇಶನದ ಪ್ರತಿ ಗಂಟೆಗೆ 24 ಲಕ್ಷ ರೂಪಾಯಿ ಪೋಲಾಗಿದೆ ಎಂದು ಮಾಹಿತಿ ಹಕ್ಕು ಕಾರ್ಯಕರ್ತ ಭೀಮಪ್ಪ ಗಡಾದ್ ಗಂಭೀರವಾಗಿ ಆರೋಪಿಸಿದ್ದಾರೆ.
ನಗರದಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, 2025 ನೇ ಸಾಲಿನ ಬೆಳಗಾವಿ ಅಧಿವೇಶನದಲ್ಲಿ, ರಾಜ್ಯದ ಬೊಕ್ಕಸದಿಂದ ಒಟ್ಟು 27,78,56,669 (ಸುಮಾರು 28 ಕೋಟಿ) ರೂಪಾಯಿಗಳನ್ನು ಖರ್ಚು ಮಾಡಲಾಗಿದೆ. ಕೇವಲ 115 ಗಂಟೆ 45 ನಿಮಿಷಗಳ ಕಾಲ ನಡೆದ ಉಭಯ ಸದನಗಳ ಕಲಾಪವನ್ನು ಲೆಕ್ಕ ಹಾಕಿದರೆ, ಸರಕಾರ ಪ್ರತಿ ಒಂದು ಗಂಟೆಗೆ ಅಂದಾಜು 24 ಲಕ್ಷ ರೂಪಾಯಿಗಳನ್ನು ಖರ್ಚು ಮಾಡಿದೆ ಎಂದು ಸರಕಾರ ವಿರುದ್ದ ಗಂಭೀರವಾಗಿ ಆರೋಪಿಸುವುದ ಮೂಲಕ ಅಸಮಾಧಾನ ಹೋರ ಹಾಕಿದರು.
ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ಬಾರಿ ಪ್ರತಿ ಗಂಟೆಯ ವೆಚ್ಚದಲ್ಲಿ 4 ಲಕ್ಷ ರೂ.ಗಳಷ್ಟು ಏರಿಕೆಯಾಗಿರುವುದು ಕಳವಳಕಾರಿ ಸಂಗತಿಯಾಗಿದೆ. ಅಧಿವೇಶನದ ವೆಚ್ಚದ ವಿವರಗಳನ್ನು ಗಮನಿಸಿದರೆ, ಗಣ್ಯರ ವಸತಿಗಾಗಿ 783 ಲಕ್ಷ, ಊಟ-ಉಪಹಾರಕ್ಕಾಗಿ 275 ಲಕ್ಷ, ಪೊಲೀಸ್ ಭದ್ರತೆಗಾಗಿ 924 ಲಕ್ಷ ಹಾಗೂ ಲೋಕೋಪಯೋಗಿ ಇಲಾಖೆಯ ಕಾಮಗಾರಿಗಳಿಗಾಗಿ 687 ಲಕ್ಷ ರೂಪಾಯಿಗಳನ್ನು ಬಳಸಲಾಗಿದೆ. ಜನಪ್ರತಿನಿಧಿಗಳಿಗೆ ಕಿಲೋಮೀಟರ್ 35 ರೂ. ಪ್ರಯಾಣ ಭತ್ಯೆ ಹಾಗೂ ದಿನಕ್ಕೆ 2500 ರೂ. ದಿನಭತ್ಯೆ ನೀಡಲಾಗುತ್ತಿದೆ.
ಆದರೆ ಈ ಭಾಗದ ಜನರ ನಿರೀಕ್ಷೆಯಂತೆ ಉತ್ತರ ಕರ್ನಾಟಕದ ಅಭಿವೃದ್ಧಿ ಕುರಿತು ಗಂಭೀರ ಚರ್ಚೆಗಳು ನಡೆಯುವ ಬದಲು, ತೆರಿಗೆದಾರರ ಹಣವು ಹೋಟೆಲ್ ಮಾಲೀಕರು ಮತ್ತು ಗುತ್ತಿಗೆದಾರರ ಪಾಲಾಗುತ್ತಿದೆ ಎಂದು ಭೀಮಪ್ಪ ಗಡಾದ್ ಗಡಾದ್ ಸರಕಾರದ ವಿರುದ್ದ ಆರೋಪಿಸಿದರು.
