ಬೆಳಗಾವಿ-೨೨:ವೈಭವ್ ನಗರ ವಾರ್ಡ್ 45, ಚರ್ಚ್ ಸಮೀಪದ ಪ್ರದೇಶದಲ್ಲಿ ಕಳೆದ 50 ವರ್ಷಗಳಿಂದ ವಾಸಿಸುತ್ತಿರುವ ಜನರು ಇಂದಿಗೂ ನೀರು, ಗಟಾರು, ಮತ್ತು ರಸ್ತೆಯಂತಹ ಮೂಲಭೂತ ಸೌಲಭ್ಯಗಳು ಇಲ್ಲದೇ ಬದುಕು ಸಾಗಿಸುತ್ತಿದ್ದಾರೆ. ನೂರಾರು ಮನೆಗಳು ಇಲ್ಲಿ ಇರುವುದಕ್ಕೂ, ನಿವಾಸಿಗಳು ಪ್ರತಿವರ್ಷ ತೆರಿಗೆ ಪಾವತಿಸುತ್ತಿರುವುದಕ್ಕೂ, ಈ ಸಮಸ್ಯೆಗಳ ಕುರಿತು ಸ್ಥಳೀಯ ಆಡಳಿತ ಮತ್ತು ಜನಪ್ರತಿನಿಧಿಗಳಿಂದ ಯಾವುದೇ ಸ್ಪಂದನೆ ಕಂಡುಬಂದಿಲ್ಲ.
ನೀರು ಮತ್ತು ಗಟಾರು ವ್ಯವಸ್ಥೆ ಕೊರತೆಯಿಂದ ಜನರ ಸಂಕಷ್ಟ
ಈ ಪ್ರದೇಶದಲ್ಲಿ ಶುದ್ಧ ನೀರಿನ ಸರಬರಾಜು ತೀವ್ರವಾಗಿ ಹಿನ್ನಡೆಯಾಗಿದೆ. ಗಟಾರು ವ್ಯವಸ್ಥೆಯಿಲ್ಲದೇ, ಜಮಿನಿನಲ್ಲಿ ಕಸಕಡ್ಡಿ ತುಂಬಿ ಹೋಗಿ, ಪರಿಸರವು ದುರಸ್ಥಿಯಾಗಿದ್ದು, ಸ್ಥಳೀಯ ನಿವಾಸಿಗಳ ದೈನಂದಿನ ಬದುಕಿಗೆ ದೊಡ್ಡ ತೊಂದರೆ ತಂದೊಡ್ಡುತ್ತಿದೆ. “ಮಳೆ ಬಂದರೆ, ನೀರು ಚಿಮುಕಿದರೆ, ಕಸದ ದುರ್ವಾಸನೆಯ ನಡುವೆಯೇ ಬದುಕಬೇಕಾಗಿದೆ,” ಎಂದು ಸ್ಥಳೀಯರು ತಮ್ಮ ದುಃಖವನ್ನು ವ್ಯಕ್ತಪಡಿಸುತ್ತಿದ್ದಾರೆ.
ರಸ್ತೆಯಿಲ್ಲದ ಹೋರಾಟ
ಈ ಪ್ರದೇಶದಲ್ಲಿ 50 ವರ್ಷಗಳಿಂದ ರಸ್ತೆ ನಿರ್ಮಾಣವಾಗಿಲ್ಲ. ಮಳೆಗಾಲದಲ್ಲಿ ಈ ಪ್ರದೇಶವು ನೀರಿನಿಂದ ತುಂಬಿ, ಜನರು ಮನೆಯೊಳಗೆ ಮಾತ್ರ ಸೀಮಿತವಾಗಬೇಕಾಗಿದೆ. ವಿದ್ಯಾರ್ಥಿಗಳು, ವೃದ್ಧರು, ಮತ್ತು ತುರ್ತು ಅಗತ್ಯಗಳಿಗಾಗಿ ಪ್ರಯಾಣಿಸುವವರು ದೊಡ್ಡ ಸಮಸ್ಯೆಗೆ ಸಿಲುಕಿದ್ದಾರೆ. “ಇಲ್ಲಿ ರಸ್ತೆ ಇರುವುದೇ ಕನಸಾಗಿ ಉಳಿದಿದೆ,” ಎಂದು ಮಹಿಳೆಯೊಬ್ಬರು ಕಳವಳ ವ್ಯಕ್ತಪಡಿಸಿದರು.
ಆರೋಗ್ಯಕ್ಕೆ ಅಪಾಯ – ಮಲೇರಿಯಾ ಮತ್ತು ಡೆಂಗ್ಯೂ ವ್ಯಾಪಕ
ಕಸಕಡ್ಡಿ ಮತ್ತು ಹಾಳಾದ ಪರಿಸರದಿಂದಾಗಿ ಹಾವು-ಹುಳುಗಳು ಹೆಚ್ಚಾಗಿದ್ದು, ಸೊಳ್ಳೆಗಳ ಸಂಖ್ಯೆಯೂ ಗಣನೀಯವಾಗಿ ಏರಿಕೆಯಾಗುತ್ತಿದೆ. ಇದರಿಂದ ಮಲೇರಿಯಾ ಮತ್ತು ಡೆಂಗ್ಯೂ ರೋಗಗಳು ವ್ಯಾಪಕವಾಗಿ ಹರಡುತ್ತಿದ್ದು, ಜನರ ಆರೋಗ್ಯದ ಮೇಲೆ ಪ್ರಭಾವ ಬೀರುತ್ತಿದೆ.
ಪಾಲಿಕೆಗಳ ನಿರ್ಲಕ್ಷ್ಯ
“50 ವರ್ಷಗಳಿಂದ ನಾವು ವಾಸಿಸುತ್ತಿದ್ದರೂ, ಜನಪ್ರತಿನಿಧಿಗಳಿಂದ ಮತ್ತು ಅಧಿಕಾರಿಗಳಿಂದ ಯಾವುದೇ ಸ್ಪಂದನೆ ಕಾಣುತ್ತಿಲ್ಲ. ಚುನಾವಣೆ ಬಂದ್ರೆ ಪ್ರಚಾರಕ್ಕೆ ಮಾತ್ರ ಬರುವರು, ಆದರೆ ಸಮಸ್ಯೆಗಳಿಗೆ ಪರಿಹಾರ ಮಾಡುವ ಉತ್ಸಾಹವೇ ಕಾಣುವುದಿಲ್ಲ,” ಎಂದು ಸ್ಥಳೀಯರು ಕೋಪಗೊಂಡು ಹೇಳುತ್ತಾರೆ.
ನಿವಾಸಿಗಳ ಬೇಡಿಕೆ
ಸ್ಥಳೀಯರು ನೀರು, ಗಟಾರು, ಮತ್ತು ರಸ್ತೆಗಳನ್ನು ತಕ್ಷಣವೇ ಕಲ್ಪಿಸುವಂತೆ ಶಾಸಕರಿಗೆ ಮತ್ತು ಪಾಲಿಕೆ ಅಧಿಕಾರಿಗಳಿಗೆ ಮನವಿ ಮಾಡುತ್ತಿದ್ದಾರೆ. “ನಾವು ಇನ್ನಷ್ಟು ತಾಳಲು ಸಾಧ್ಯವಿಲ್ಲ. ಈಗಾಗಲೇ ನಮ್ಮ ನಾಡು, ನಮ್ಮ ಜನರು ನೈತಿಕವಾಗಿ ಮತ್ತು ಶಾರೀರಿಕವಾಗಿ ಸಂಕಷ್ಟಕ್ಕೆ ಸಿಲುಕಿದ್ದಾರೆ,” ಎಂದು ಹಿರಿಯರು ಹೇಳಿದ್ದಾರೆ.
ವೈಭವ್ ನಗರ ವಾರ್ಡ್ 45 ಜನರ 50 ವರ್ಷಗಳ ಸಂಕಷ್ಟಗಳಿಗೆ ತಕ್ಷಣವೇ ಪರಿಹಾರ ನೀಡುವ ಅಗತ್ಯವಿದೆ. ನಗರ ಪಾಲಿಕೆ ಮತ್ತು ಶಾಸಕರು ಈ ಸಮಸ್ಯೆಗಳಿಗೆ ಸ್ಪಂದಿಸಿ, ತಕ್ಷಣ ಕ್ರಮ ಕೈಗೊಳ್ಳುವಂತೆ ‘ನಮ್ಮ ನಗರ ನ್ಯೂಸ್’ ಮನವಿ ಮಾಡುತ್ತಿದೆ.
