ಬೆಳಗಾವಿ-೧೯: ಮರಾಠಿ ಭಾಷೆಯ ಸಂರಕ್ಷಣೆಗಾಗಿ ಶ್ರಮಿಸುತ್ತಿರುವ ಪಿಎಫ್‌ಇ ಸೊಸೈಟಿ ನಡೆಸುತ್ತಿರುವ ಬಾಲಿಕಾ ಆದರ್ಶ ಶಾಲೆಯು ಕಳೆದ 86 ವರ್ಷಗಳಿಂದ ಹೆಣ್ಣುಮಕ್ಕಳಿಗೆ ಆದರ್ಶ ಶಾಲೆಯಾಗಿ ಹೆಸರುವಾಸಿಯಾಗಿದೆ. 1937 ರಿಂದ 2024 ರವರೆಗಿನ ಈ ಶಾಲೆಯ ಹಳೆಯ ವಿದ್ಯಾರ್ಥಿಗಳ ಸ್ನೇಹ ಸಮ್ಮೇಳನ ಮೇ.೨೬ ಭಾನುವಾರ ನಡೆಯಲಿದೆ. ರಾಮನಾಥ ಮಂಗಲ ಕಾರ್ಯಾಲಯದಲ್ಲಿ ನಡೆಯಲಿದ್ದು, ಮುಖ್ಯ ಅತಿಥಿಗಳಾಗಿ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವೆ ಲಕ್ಷ್ಮೀ ಹೆಬ್ಬಾಳಕರ್, ಮುಖ್ಯ ಭಾಷಣಕಾರರಾಗಿ ಡಾ. ಆಸಾವರಿ ಸಂತ ಉಪಸ್ಥಿತರಿರುವರು ಎಂದು ಸಂಸ್ಥೆಯ ಅಧ್ಯಕ್ಷ ಗೋವಿಂದ ಫಡಕೆ ಶನಿವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಶಿಕ್ಷಣ ಮಹರ್ಷಿ ಧೋಂಡೆ ಕೇಶವ ಕರ್ವೆ ಅವರ ಕಾರ್ಯದಿಂದ ಪ್ರಭಾವಿತರಾಗಿ 1937ರಲ್ಲಿ ಸಂಸ್ಥಾಪಕಿ ಸುಮಿತ್ರಾಬಾಯಿ ಸೋಹನಿ ಅವರು ಎರಡು ಕೊಠಡಿಗಳ ಜಾಗದಲ್ಲಿ ಈ ಶಾಲೆ ಆರಂಭಿಸಿದರು. ಅವರಿಗೆ ಕಮಲಾಬಾಯಿ ಛತ್ರೆಯವರ ಬೆಂಬಲ ಸಿಕ್ಕಿತು. ಇಬ್ಬರೂ ಮನೆ ಮನೆಗೆ ತೆರಳಿ ಹೆಣ್ಣು ಮಕ್ಕಳನ್ನು ಶಾಲೆಗೆ ಕರೆತಂದರು. ಶಾಲೆಯು ಯಾವಾಗಲೂ ಪ್ರಗತಿಯಲ್ಲಿದೆ. ಗ್ರಾಮೀಣ ಭಾಗದ ವಿದ್ಯಾರ್ಥಿಗಳು ಈ ಶಾಲೆಯಲ್ಲಿ ಮುಖ್ಯಗುರುಗಳ ಮಾರ್ಗದರ್ಶನದಲ್ಲಿ ಓದುತ್ತಿದ್ದಾರೆ. ಅಟಲ್ ಲ್ಯಾಬ್, ಕೈ, ಮೋಹನ್ ಶಾನಭಾಗ್ ವಿಜ್ಞಾನ ಪ್ರಯೋಗಾಲಯ, ಗ್ರಂಥಾಲಯ, ಕಂಪ್ಯೂಟರ್ ರೂಂ, ಟರ್ಫ್ ಗ್ರೌಂಡ್, ಬಾಕ್ಸಿಂಗ್ ರಿಂಗ್ ಹೀಗೆ ನಾನಾ ಸೌಲಭ್ಯಗಳನ್ನು ಹೆಣ್ಣು ಮಕ್ಕಳಿಗೆ ನೀಡಲಾಗುತ್ತಿದೆ. ಶಾಲೆ ಹಳೆಯದಾಗಿದ್ದು, ಕಾಲದ ಅಗತ್ಯವನ್ನು ಗಮನದಲ್ಲಿಟ್ಟುಕೊಂಡು ಶಾಲೆಯನ್ನು ನವೀಕರಿಸಲು ಸಂಸ್ಥೆ ನಿರ್ಧರಿಸಿದೆ. ಇದಕ್ಕೆ ಸಮಾಜದ ಸಹಕಾರ ಅಗತ್ಯ ಎಂದರು. ಈ ವೇಳೆ ಕಾರ್ಯಕಾರಿಣಿ ಸದಸ್ಯ ಪ್ರೊ. ಮಾಧುರಿ ಶಾನಭಾಗ, ಪ್ರೊ. ಆನಂದ ಗಾಡಗೀಳ್ ಮತ್ತು ಪ್ರಾಚಾರ್ಯ ಎನ್. ಓ. ಡೊನಕರಿ ಸುದ್ದಿ ಗೋಷ್ಠಿಯಲ್ಲಿ ಹಾಜರಿದ್ದರು.
